21 мамырда Қазақстан Республикасы Орталық сайлау комиссиясының отырысы өтті. Оған саяси партиялар мен ЕҚЫҰ/ДИАҚБ миссиясының өкілдері қатысты.
Отырыста мынадай мәселелер қаралды:
1. «Әрбір сайлау учаскесі бойынша тиісті әкім қол қойған сайлаушылар тізімдерін акт бойынша сайлау комиссияларына беру туралы»
2. «Дауыс беруге арналған бюллетень мәтінін бекіту және олардың дайындалуын қамтамасыз ету туралы»
3. «2019 жылғы 9 маусымға тағайындалған Қазақстан Республикасы Президентінің кезектен тыс сайлауына халықаралық ұйым байқаушысын аккредиттеудің күшін жою туралы»
4. «2019 жылғы 9 маусымға тағайындалған Қазақстан Республикасы Президентінің кезектен тыс сайлауына халықаралық ұйымдар мен шет мемлекеттердің байқаушыларын аккредиттеу туралы»
«Әрбір сайлау учаскесі бойынша тиісті әкім қол қойған сайлаушылар тізімдерін акт бойынша сайлау комиссияларына беру туралы»
Бұл мәселе бойынша облыстардың, Нұр-Сұлтан, Алматы, Шымкент қалаларының аумақтық сайлау комиссиялары бейнеконференц байланысы режимінде сөз сөйледі.
Әрбір сайлау учаскесі бойынша сайлаушылар тізімідерін сайлау комиссияларына тиісті әкімдіктер дауыс беру басталардан жиырма күн бұрын — 2019 жылғы 20 мамырда берді.
Осы тізімдерге сай сайлаушылардың жалпы саны 11 947 995-ті құрады.
Қазақстан Республикасының сайлаушылары, олардың тұрғылықты жері бойынша құрылған сайлау учаскелерінде он бес күн ішінде сайлаушылардың тізімдерімен таныса алады.
Осы уақыттан бастап азаматтарға сайлаушылардың тізімдеріндегі өздері туралы, олардың тіркелген жері бойынша деректерді тексеру, өздерінің деректерінің анық еместігіне жол берілген, тізімге енгізілмеген, дұрыс енгізілмеген немесе шығарылғандығына шағымдану мүмкіндігі қамтамасыз етіледі.
«Дауыс беруге арналған бюллетень мәтінін бекіту және олардың дайындалуын қамтамасыз ету туралы»
Орталық сайлау комиссиясының хатшысы Сабила Сапарқызы Мұстафина өз баяндамасында 2019 жылғы 20 мамырда сайлау учаскелеріне тиісті әкімдер қол қойған сайлаушылардың тізімдері берілгенін хабарлады.
«Қазақстан Республикасындағы сайлау туралы» Конституциялық заңның 37-бабы 2-тармағына сәйкес сайлау бюллетеньдерi сайлаушылардың жалпы санының 1 процентi резервiмен сайлаушылардың санына тең мөлшерде дайындалады.
Осыған байланысты, 12 067 475 сайлау бюллетенін дайындау қажет.
Орталық сайлау комиссиясы Президенттi сайлау жөнiндегі дауыс беруге арналған бюллетеньдердiң нысаны мен мәтiнiн белгiлейдi; сондай-ақ оларды дайындауды қамтамасыз етедi. Президентті сайлау жөніндегі сайлау бюллетенінің нысаны Орталық сайлау комиссиясының 2018 жылғы 23 тамыздағы № 11/192 қаулысының 1- қосымшасына сәйкес белгіленген. Сайлау бюллетенiне мемлекеттiк тiлдiң әлiпбилiк тәртiбiмен тегi, аты, әкесiнiң аты көрсетiле отырып, барлық тiркелген кандидаттар енгiзiледi.
Сонымен қатар, бюллетеньдерді қолдан жасаудан және тиісінше оларды бұрмалаудан қорғауды қамтамасыз ету мақсатында сайлау бюллетеньдерінің қорғалу дәрежесі белгіленді.
Сайлау бюллетеньдерін облыстық, республикалық маңызы бар қалалардың, астананың сайлау комиссияларына жеткізу арнайы байланыспен жүзеге асырылады.
Облыстық, республикалық маңызы бар қалалар мен астананың сайлау комиссияларына сайлау бюллетеньдерін үш күннен, яғни 6 маусымнан ерте емес және сайлауға дейін бір күннен, яғни 8 маусымнан кешіктірмей жеткізуді қамтамасыз ету қажет.
«2019 жылғы 9 маусымға тағайындалған Қазақстан Республикасы Президентінің кезектен тыс сайлауына халықаралық ұйым байқаушысын аккредиттеудің күшін жою туралы»
Орталық сайлау комиссиясының мүшесі Зәуреш Хамитқызы Баймолдинаның баяндамасына сәйкес шет мемлекеттердің және халықаралық ұйымдардың байқаушыларын аккредиттеудің күшін жоюды Сыртқы істер министрлігінің ұсынуы бойынша Орталық сайлау комиссиясы жүзеге асырады.
ЕҚЫҰ/ДИАҚБ-ның сайлауды байқау жөніндегі Миссиясының хатының және Қазақстан Республикасы Сыртқы істер министрлігінің ұсынымы негізінде ЕҚЫҰ/ДИАҚБ-ның сайлауды байқау жөніндегі Миссиясының байқаушысы Александр Джон Фолксты аккредиттеудің күшін жою және куәлігін кері қайтарып алу туралы қаулы қабылданды.
Осыған байланысты «2019 жылғы 9 маусымға тағайындалған Қазақстан Республикасы Президентінің кезектен тыс сайлауына халықаралық ұйымдардың байқаушыларын аккредиттеу туралы» Қазақстан Республикасы Орталық сайлау комиссиясының 2019 жылғы 6 мамырдағы № 28/262 қаулысымен бекітілген, Қазақстан Республикасы Президентінің кезектен тыс сайлауына Қазақстан Республикасы Орталық сайлау комиссиясының жанында аккредиттелген халықаралық ұйымдар байқаушыларының тізімінде:
«4. ЕҚЫҰ/ДИАҚБ-ның сайлауды байқау жөніндегі Миссиясы» бөлімінде реттік нөмірі 40 «7. Alexander Jonh Folkes» деген жол алынып тасталған.
«2019 жылғы 9 маусымға тағайындалған Қазақстан Республикасы Президентінің кезектен тыс сайлауына халықаралық ұйымдар мен шет мемлекеттердің байқаушыларын аккредиттеу туралы»
Орталық сайлау комиссиясының мүшесі Зәуреш Хамитқызы Баймолдина өз баяндамасында Сыртқы істер министрлігінен бірқатар Миссиялардың байқаушыларын аккредиттеуге ұсыныстар келіп түскенін хабарлады:
— 35 байқаушы Тәуелсіз Мемлекеттер Достастығынан байқаушылар Миссиясының құрамында;
— 1 байқаушы Еуропадағы қауіпсіздік және ынтымақтастық ұйымының Демократиялық институттар және адам құқықтары бюросы миссиясының құрамында;
-7 байқаушы Түркітілдес мемлекеттердің ынтымақтастық кеңесі Миссиясы құрамында.
Сонымен қатар Армения, Болгария, Грузия, Малайзия, Молдова, Латвия, Ресей Федерациясы және Түркияның орталық сайлау органдарының өкілдері болып табылатын шет мемлекеттерден 16 байқаушы ұсынылып отыр.
Барлығы 59 байқаушыны аккредиттеуге ұсынылды.
Аккредиттеуге ұсынымдардың келіп түсуіне қарай байқаушылар жөніндегі деректер жаңартылатын болады.
Шет мемлекеттер мен халықаралық ұйымдардың байқаушыларын аккредиттеуді Ортсайлауком 2019 жылғы 3 маусым күнгі сағат 18.00-ге дейін жүзеге асырады.
Пікірлер